प्रदेश २ का मुख्यमन्त्री लालबाबु राउतले बुधबार मन्त्रिपरिषद् विस्तार गरेका छन् । पार्टीभित्र विवाद आएपछि महन्थ ठाकुर पक्षीय मन्त्रीलाई हटाएर उपेन्द्र यादव पक्षका राउतले काँग्रेसलाई समेटेर मन्त्रिपरिषद् विस्तार गरेका हुन् ।
‘मधेस भवन’ मा काँग्रेसबाट मन्त्री नियुक्त भएका तीन जनाको शपथ कार्यक्रम निकै अव्यवस्थित देखिन्थ्यो । बाहिर खुला स्थानमा राखिएको शपथ कार्यक्रममा राम्रो बत्तीको पनि व्यवस्था गरेको देखिदैनथ्यो भने नेता कार्यकर्ताको भीडले कोरोनालाई गिज्याइरहेको जस्तो देखिन्थ्यो ।

बिना मास्क शपथ लिएका मन्त्रीहरुलाई सहयोगी तथा नेताहरुले शपथ बाचन बर्दा अँध्यारो भएकाले मोबाइलको टर्च बालिरहेको दृश्य देखिन्थ्यो ।

जसपा नेतृत्वको सरकारमा आज नेकपा माओवादी पनि सहभागि भनिएपनि अन्तिम समयमा आएर भागबण्डा नमिल्दा काँग्रेसमात्रै सरकारमा सहभागी भएको हो । माओवादीलाई मनाउने प्रयासस्वरुप अबेरसम्म वार्तामा बस्नु परेकाले काँग्रेसका मन्त्रीहरुको शपथ राति १० बजेमात्रै भएको हो ।
प्रदेश २ सरकारमा काँग्रेसबाट रामसरोज यादव, ओमप्रकाश शर्मा र वीरेन्द्र सिंह मन्त्री बनेका छन् । जसपासँग दुई बुँदे सहमति भएपछि काँग्रेस सरकारमा सहभागी बनेको हो।