काठमाडौंको टोखा नगरपालिकाले सलह किरा सङ्कलन गरेर आफ्नो वडामा बुझाउने व्यक्तिलाई प्रतिकिलो ५० रुपैयाँ प्रोत्साहन भत्ता दिने भएको छ। काठमाडौँको उत्तरी क्षेत्रमा रहेको टोखा नगरपालिकामा सलह फैलिएपछि नगरपालिकाले यस्तो निर्णय गरेको हो।

मेयर प्रकाश अधिकारीले सलह किराले ठूलो क्षेत्रमा कृषिबाली नष्ट गर्न थालेपछि यसको नियन्त्रणका लागि प्रोत्साहनस्वरुप रकम उपलब्ध गराउने घोषणा गरिएको जानकारी दिए। सलह किरा नियन्त्रणका लागि किराको बासस्थान पहिचान गरी बिहान ६ बजेदेखि ८ बजेसम्म र बेलुका ६ बजेदेखि ७ बजेसम्म मालथियन, क्लोरोपाइरिफस, बोरिक एसिडलगायतका विषादी प्रयोग गर्न पनि टोखा नगरपालिकाले किसानलाई आग्रह गरेको छ।

यस्तै सलह बसेको रुख तथा बोटविरुवा हल्लाई किरा भगाउने, सलह किरा बढी प्रोटिनयुक्त भएकाले मारेर हाँस तथा कुखुराको दानामा प्रयोग गर्न पनि कृषकलाई आग्रह गरिएको छ।

सलह किरा साँझपख बोटबिरुवामा झुण्ड बनेर बस्ने भएकाले यसलाई भगाउन थाल, मादल, टिन ठटाउन, खेती संरक्षणका लागि झुलले बालीलाई ढाक्न पनि नगरपालिकाले आग्रह गरेको छ। रासस


खबर ब्रेक संवाददाता
खबर ब्रेक संवाददाता
editor@khabarbreak.com
क्रियशन मिडिया एण्ड इमेन्ट म्यानेजमेन्ट प्रालिद्वार सञ्चालित खबरब्रेक डटकम हेटौँडाको पहिलो तथा लोकप्रिय अनलाईन पत्रिका हो ।