बेहुलाले दाइजोमा आएको पौने १८ लाख अस्विकार गरेपछि…

एजेन्सी- पछिल्लो समय दाइजो लिनुदिनु सामाजिक कुरीति मानिदै आएको छ । तर अझै पनि कतिपय स्थानमा दाइजोको रकम लेनदेन गरेर मात्र विवाह गरिन्छ ।

तराईका केही जिल्लामा दाइजोको डरलाग्दो रुप छ । दाइजो नल्याएको निहुँमा बुहारीलाई कुटपिट गर्ने, जलाउने, मार्नेसम्मका घटनाहरु भएका छन् । दाइजोमा भनेजति रकम नपुग्दा कतिले विवाहसमेत तोडेर हिँडेका थुप्रै उदाहरणहरु छन् । यस्तैमा भारतको राजस्थानमा एक बेहुलाले बेहुली पक्षबाट दिइएको ११ लाख भारु अस्विकार गरेका छन् ।

भारतको जयपुरस्थित राजस्थानमा एक बेहुलाले दाइजोमा दिइएको पौने १८ लाख रुपैयाँ (भारु ११ लाख) अस्विकार गरेका छन् । विवाहमा ससुराले सगुनभन्दै ११ लाख भारुले भरिएको थाली बेहुलालाई दिएपछि बेहुलाले उक्त रकमलाई अस्विकार गरेका हुन् ।

भारतको केन्द्रीय औद्योगिक सुरक्षा बल, छत्तीसगढमा सिपाही पदमा कार्यरत कर्मचारी जितेन्द्र सिंह जन्ती लिएर जयपुरको अम्बावाडी पुगे । त्यहाँ जितेन्द्रको विवाह गोविन्द सिंह शेखावतकी छोरी चञ्चलसँग हुनेवाला थियो ।

विवाहमा सबै रीति र विवाह प्रक्रिया सामान्य स्थितीमा चल्यो । तर जब बेहुली पक्षबाट बेहुलालाई दाइजो रकम भन्दै ११ लाखले भरिएको थाली दिइयो । तब बेहलाले उक्त रकम लिन अस्विकार गर्दै ससुराका अगाडि हात जोडेर उभिए ।

बेहुलाले रकम लिन अस्विकार गरेपछि बेहुली पक्षका धेरै मानिसले सरकारी जागिरे भएकाले बेहुलाले रकममा असन्तोष गरेको अड्कल काटेका थिए ।

तर, हात जोडेर उभिएका जितेन्द्रले आफू दाइजो प्रथाको विरोधी रहेकाले उक्त रकम नलाने बताए । जितेन्द्रले आफ्नी हुनेवाला पत्नीले एलएलबी गरेको र पीएचडी अध्ययन गर्दै गरेकाले आफूलाई श्रीमतीको सोही शिक्षा दाइजो भएको भन्दै रकम लिन अस्विकार गरेका हुन् ।

यस कुराबाट विवाहस्थलका धेरै मानिस भावुक बने । र अन्ततः सगुन स्वरुप ११ रुपैयाँ भारु लिएर बेहुलाले विवाह गरे । बेहली चञ्चलले न्यायाधीश पदका लागि आवेदनसमेत दिएकी छन् ।


खबर ब्रेक संवाददाता
खबर ब्रेक संवाददाता
editor@khabarbreak.com
क्रियशन मिडिया एण्ड इमेन्ट म्यानेजमेन्ट प्रालिद्वार सञ्चालित खबरब्रेक डटकम हेटौँडाको पहिलो तथा लोकप्रिय अनलाईन पत्रिका हो ।