हेटौँडा ६ माघ,
३ नम्बर प्रदेशको प्रदेश सभा सचिवालय स्थापना गरिएको छ । प्रदेश नम्बर ३ को अस्थायी मुकाम हेटौंडास्थित मध्यमाञ्चल क्षेत्रीय शिक्षा निर्देशनालयको भवनमा सचिवालय स्थापना गरिएको हो ।
आईतबार प्रदेशसभा सदस्यको सपथ ग्रहण समारोह आयोजना हुने भएपछि शनिवार प्रदेशसभा सचिवालय स्थापना गरिएको छ ।
प्रत्यक्ष र समानुपातिक तर्फबाट निर्वाचित १ सय १० सांसदहरुलाई तीन नम्बर प्रदेश प्रमुख अनुराधा कोइरालाले सपथ खुवाउने कार्यक्रम तय भएको छ ।
मध्यक्षेत्रीय प्रशासन कार्यालय भवनलाई प्रदेश प्रमुखको कार्यालयको रुपमा स्थापना गरिएको छ । प्रदेश प्रमुखको कार्यकक्ष र निवास व्यवस्था भईसकेको छ ।
प्रदेश सभाको बैठकमा सहभागी हुन आउने सांसदहरुलाई हेटौंडामा स्वागतको समेत तयारी भएको छ । जिल्ला समन्वय समितीको पहलमा शनिवार बसेको बैठकले सांसदहरुलाई बैठक स्थलसम्म ल्याउने, लैजाने, खाना खुवाउने र बिश्राम गराउने व्यवस्था गरेको छ ।
स्थानीय सामाजिक संघसंस्था, हेटौंडा उपमहानगरपालिका, होटल एशोशियशन मकवानपुर, नारायणी यातायात व्यवसायी संघ, मकवानपुर उद्योग वाणिज्य संघ लगायतका सामाजिक संघसंस्थाको समन्वयमा स्वागतको तयारी भएको हो ।
प्रतिक्रिया दिनुहोस्
कमेन्टहरु बन्द गरिएको छ ।