९ पुष,यो सिजनको पहिलो एल क्लासिको भिडन्तमा बार्सिलोनाले रियल मड्रिडलाई ३–० को लज्जास्पद हार चखायो । शनिबार साँझ भएको यो भिडन्तमा विश्व वर्ष खेलाडी क्रिस्टियानो रोनाल्डोमाथि लियोनेल मेसी पुरै हाबी भए ।
बार्सिलोनाले गरेका तीनमध्ये एक गोल मेसीकै नाममा रह्यो भने दुई गोलका लागि उनले अवसर समेत मिलाइदिए । उनी स्पेनिस ला लिगामा २ सय गोलको अवसर मिलाइदिने खेलाडीको रेकर्ड राख्न पनि सफल भएका छन् ।
रियलविरुद्ध बार्सिलोनाको सनसनी जितको जति चर्चा भएको छ, त्यति नै चर्चा अहिले मेसीले रियल मड्रिडविरुद्ध प्रहार गरेको फ्री किकको पनि भइरहेको छ ।
रियलविरुद्ध दोस्रो हाफमा सबै तीन गोल गरेको बार्सिलोनाका लागि पहिलो हाफको अन्तिम समयमा रियलको डी एरिया भन्दा केही फुट बाहिरबाट बार्सिलोनाले फ्री किक पाएको थियो ।
त्यो फ्री किक हान्ने जिम्मा मेसीले लिएका थिए भने त्यसलाई छेक्ने रियलको मानव वालमा क्रिस्टियानो रोनाल्डो पनि खडा थिए । जब मेसीले त्यो फ्री किक रियलको पोस्टको दिशामा प्रहार गरे, तब बल सिधै गएर रोनाल्डोका अनुहारमा गएर लाग्यो । त्यसपछि रोनाल्डोको अनुहारको भाव पुरै बिग्रन पुग्यो भने गोल गर्न नसकेकोमा मेसी पनि चुक्चुकाए ।
मेसीको यो फ्री किकलाई लिएर अहिले सामाजिक सञ्जालमा फरक फरक धारणा आइरहेका छन् । रियलका केही समर्थकले मेसीले नियतवश रोनाल्डोको अनुहारमै लाग्ने गरी फ्री किक हानेको समेत भन्न भ्याएका छन् ।
तर, बार्सिलोनाका समर्थकले भने मेसीले पोस्टको दिशा दिने क्रममा अग्लिएको बल मानव वालमा खडा सबैभन्दा अग्ला रोनाल्डोलाई लाग्न पुगेको टिप्पणी गरेका छन् । बार्सिलोनाले रियलको होम ग्राउन्डमा लगातार तीन खेल जितेपछिको चर्चा एकातिर छँदैछ, अर्कातिर मेसीको फ्री किकलाई लिएर दुई क्लबका समर्थक पनि सामाजिक सञ्जालमा झगडा गर्न भ्याइरहेका छन् ।
https://www.youtube.com/watch?time_continue=14&v=MZDXUX9cDaA
प्रतिक्रिया दिनुहोस्
कमेन्टहरु बन्द गरिएको छ ।